Кошаркарите на Бостон Селтикс ја продолжија доминацијата во НБА лигата и ја забележаа 14. победа во низа. Пред „казнената експедиција“ од Бостон падна актуелниот првак Голден Стејт вориорс (92:88) и покрај тоа што Селтикси во третиот период имаа негатива од 17 поени.

Сезоната за Селтикс почна лошо откако во првиот меч по само пет минути игра тешко се повреди големото засилување Городон Хејворд. Екипата на Бред Стивенс ги загуби првите две средби, а потоа влезе во серијата победи која не успеа да ја прекине ниту актуелниот првак.

Бостон и покрај негативата од 17 поени, мечот со Голден Стејт успеа да го однесе во неизвесна завршница. На 82 секунди до крајот Клеј Топмсон постигна поени за предност на Вориорс (88:86). Поените на Томпсон беа последни за Голден Стејт на мечот кој Бостон го заклучи со серија од шест коша. Вориорси до крајот имаа многу нереализирани удари, а Бостон поентираше од линијата за слободни фрлања.

Џејлен Браун со 22 поени и 7 скока беше предводникот на Селтикс, Ал Хорфорд оствари „дабл-дабл“ од 18 поени и 11 скока, а Кајри Ирвинг забележа 16 поени, 5 скока и 6 асистенции.

Кевин Дурент беше единствениот расположен играч на Голден Стејт, тој постигна 24 поени, додека потфрли Стеф Кари со само 9 поени (3/14).

Во вториот натпревар Хјустон лесно се справи со најлошиот тим во лигата, Феникс Санс. Рокетси славеа со 142:116, а мечот беше решен по првата четвртина во која Хјустон постигна 45 поени.

Дуелот го обележа и враќањето на Крис Пол во тимот на Хјустон, кој поради повреда не играше три недели.

Пол одигра 20 минути и оствари „дабл-дабл“ од 11 поени и 10 асистенции.

Монструозна партија имаше Џејмс Харден со 48 поени, 2 скока и 7 асистенции. Одличен натпревар одигра и Рајан Андерсон, кој постигна 24 поени.